Helpen onthoolden

Helpen Onthoolden – kaarten bestellen vuur ’n Jubileumoamnd op 29 november!

He’j oe al anmeald vuur oonzen Jubileumoamnd op 29 november in de Reggehof in Goor?
Et kan dize wekke nog, mar woch nich tot ’n letsten dag, et zol jammer wean da’j der dan net achterdaal kiekt en den feestoamnd mist.

Met völ plezear kö’w wierum kieken op 21 november met ’s morns de schriefwedstried en de priesoetreiking doar achteran.
’s Middaagns was der ’n geslaagd Congres ‘Aover ’n Poal’ met ofwisselende vuurdrachten oaver oonze sproak en tuskenduur luusterleedjes van Huub Ruel.

Et programma van ’n feestoamd in Goor zal ok elke leefhebber van ’t Twents ansprekken. Met prakkezoadsies van Gerrit Dannenberg oaver ‘hoo et wieder geet met oonze sproak’,
leedjes van Lotte Aarnink, Frank Droste en Heleen Temmink, Paul Wiefferink met ziene rake en geneuglijke kuieriej en ‘t optreden van et bekeande gezelschap Tweeduuster.
Oonze leden könt an ’t eand van den oamnd et gratis jubuleumbook metnemmen en vuur aandere dislectleefhebbers is et book den oamnd te koop vuur de jubileumpries van € 10,-.
Noa ofloop is der geleagenheid um tehope nog wat noa te kuiern oaver ’n jubileumoamnd.

Um de pries hoo’j et nich te loaten, de entree is € 16,- per persoon en de koffie met wat lekkers an ’t begin van den oamnd zit biej de pries inbegreppen.

Kaarten kö’j bestellen a’j oonderstaande link anklikt op ‘n pc of laptop of IPhone, dan kom iej op de stea woara’j oene kaarten vuur 29 november könt bestellen.
Iej kriegt eerst ‘n Kroezeboom te zeen en vandoar oet kö’j verdan, wis zich vanzölf.

Https://mijnetickets.shop/kreenk-vuur-de-twentse-spraok

Het bestuur van’ Kreenk weanst oeleu völ wille op ’n Jubileumoamnd in de Reggehof!

Nen mooien muziekoamnd op 19 september

Albert Bartelds, bekeand duur ziene optredens met sprekwöare biej RTV-Oost en de Podcasts met Hendrik Jan Bökkers kump spöllen met de Verveners .
Zee doot mooie luusterleedjes in ’t Nedersaksisch.
Ok döt Albert den oamnd speciaal vuur oons nen muziekkwis met leedjes in dialecten.
Kön iej ok heuren um welk dialect et geet?
Doarnöast doo’w den oamnd wier ne verlotting met leuke prieskes.

Et begeent um 20.00 uur, oene kom koffie steet kloar um 19.30 uur
en den kriej der zoas gebroekelijk vuur niks biej.
Leden betaalt € 10,- entree en nich-leden betaalt € 5,- meer.
Opgeven vuur 18 september biej: alievanderveer.43@gmail.com .
Et kan nog, d’r is nog plaats zat in Herberg de Pot an’ Potdiek 9 in Maarkel!

Wiej hopt der tehope nen heeln mooien oamnd van te maken!
Bestuur Kreenk vuur de Twentse Sproak

Woonsdag 26 meert 2025: 19.00 uur

JOARVERGADERING van 'n Kreenk in 't Brookshoes in Boornebrook. Vanof 20.15 uur begeent 't optreden van et duo Carima, ok oet Boornebrook. Mis dit nich, a'j nen plezerigen aomnd wilt hebben en wilt lachen!!

Carima besteet oet een tweetal levenslustige dames op lèèftied dee het één en aander an komische sketches, leedjes en gedichten in 't Twents opvoert. Eén van hen is vuur völ leu ginnen onbekenden,
Kom te hoop noar dissen oamnd en ie zölt 't metbeleamn.

Jubileumbook met schriefwedstried – inleaverdoatum is oetsteald!

Der is nog (te) weinig schriefweark vuur ’t jubileumbook binnen kömmen. Kom op leu, der is keuze genog, et mag oaver oene wonplaats goan of woara’j geboren bunt, of oaver oene joaren biej ’n Kreenk of ’n eagen oonderwearp. Vuur ’n verhaal ma’j 500 weure broeken en maximaal 14 regels vuur ’n gedich. Schrief t stukske ok in ’t Hollaands vuur leu dee meuite hebt met Twents leazen. Iej majt 2 verhalen en 2 gedichen inleaveren en noar de redaksie sturen. Geern vuur 1 meert van token joar, dan he’w nog tied um alns noa te kieken! Wiej hebt et leefst da’j de Kreenkspelling broekt (tref iej an op oonze webstea) Broek iej ne aandere spelling umda’j nich oet Twente komt, schrief et derbiej. Ok aandere variaanten van’ Nedersaksisch wördt vroagd um met te schrieven. Zet oe daal achter de pc of laptop en loat oene fantasie wearken! Tehope maakt wiej der ne mooie schriefwedstried van en ’n winnaar wördt bekeand maakt met et goolden jubileum op 21 november 2025. De redactie weanst oeleu heel völ wille dermet!

SCHRIEFWEDSTRIED –TWENTS/ NEDERSAKSISCH

i.v.m. 50-JOAR KREENK VUUR DE TWENTSE SPROAK Wiej daagt oeleu oet um met te doon an ne schriefwedstried! Umdat de Kreenk vuur de Twentse Sproak op 21 november 2025 vieftig joar besteet he’w wier ne schriefwedstried op töw zat. ’t Oonderwearp woara’j oaver schrieft kan goan oaver woar a’j noe wont of de strek woara’j joonk bunt wörden. Misschien he’j zölf ’n heel aander oonderwearp in gedachen woar a’j oaver schrieven wilt, dat mag en ’t mag netuurlijk ok oaver ’n Kreenk goan. Der wördt ok ’n mooi book van maakt, ne speciale oetgave ter ere van oons vieftig joarig bestoan. A’j ’n stukske schrieft ma’j nich meer as 500 weure broeken. Vuur ’n gedich ma’j nich meer as 14 regels broeken. Iej kriegt doar alle tied vuur, a’j oene schrieveriej vuur 31 december van dit joar inleavert is ’t good. Elkene mag 2 verhalen en 2 gedichen inleaveren en dan hopt wiej da’w token joar oons vieftig joarig bestoan met ’n mooi book könt herdeanken. A’j metdoot kriej netuurlijk ’t book vuur niks, eeuwige roem en iej könt ne pries winnen! Geern as biejloage in’ Wordbestand sturen noar: alievanderveer.43@gmail.com. Redactie Bodbreef en bestuur KTS

PLEIT AS PREVEENSI VUUR DEEL 3-ERKENNING VAN ET NEDERSAKSISCH.

Et Nedersaksisch is noe nog erkeand oonder deel 2 van et Europees Haandvest vuur regionale talen.
’n Kreenk is duur ’t SONT op de heugte brach dat der wier ne petisie in de locht is. Help met en oonderteken oonderstoande link:
Eamn klikken en et invullen geet vanzölf, doarnoa ok eamn bevestigen!

https://petities.nl/petitions/pleit-als-provincie-voor-deel-3-erkenning-van-het-nedersaksisch?locale

Met daank in ’t vuuroet en goodgoan,
Bestuur Kreenk vuur de Twentse Sproak--

--------------------------------------------------------------------------------